Монгол Улсын Шинжлэх Ухаан, Технологийн Их Сургууль (ШУТИС) болон БНСУ-ын Seoul National University of Science and Technology (SeoulTech)-ийн хамтарсан 2+2 хос дипломын хөтөлбөрийн анхны төгсөгчид болох Б.Эрхэс, М.Оюун-Эрдэнэ нар дипломоо гардан авлаа.

Тус хөтөлбөр нь оюутнуудад эхний хоёр жилээ ШУТИС-д, дараагийн хоёр жилээ SeoulTech-д суралцан олон улсын түвшний мэдлэг, ур чадвар эзэмших боломжийг олгодог бөгөөд төгсөгчид хоёр их сургуулийн дипломтой төгсдөг онцлогтой.

Б.Эрхэс, М.Оюун-Эрдэнэ нар хөтөлбөрийг амжилттай дүүргэж, ШУТИС болон SeoulTech-ийн дипломыг зэрэг хүртсэнээр тус хамтарсан хөтөлбөрийн анхны төгсөгчид болж, олон улсын боловсролын хамтын ажиллагааны шинэ хуудсыг нээлээ.

Дэлхийн боловсролыг Монголын инженерийн боловсролтой холбосон энэхүү хөтөлбөрийн анхны төгсөгчдөдөө халуун баяр хүргэж, цаашдын ажил хөдөлмөр, эрдэм боловсролын замд нь өндөр амжилт хүсье.

Та бүхний амжилт дараагийн үеийн оюутнуудад шинэ боломж, шинэ зорилго, шинэ урам зориг болох болтугай.