Хятад–Монголын хамтарсан “МОЗИ” лаборатори албан ёсоор нээлтээ хийлээ

2025 оны 4 дүгээр сарын 2-ны өдөр, Монгол Улсын Шинжлэх Ухаан, Технологийн Их Сургууль (ШУТИС)-ийн Механик инженер, тээврийн сургуульд Хятад–Монголын хамтарсан “МОЗИ” лаборатори албан ёсоор ашиглалтад орлоо.

Тус лаборатори нь Монгол Улсын Засгийн газраас хэрэгжүүлж буй “Боомтын сэргэлт” бодлогын хүрээнд тээвэр, логистикийн салбарт олон улсын түвшний мэргэжилтэн, инженер бэлтгэхэд үнэтэй хувь нэмэр оруулах стратегийн ач холбогдолтой юм.

Лаборатори нь 2023 оны 9 дүгээр сард байгуулсан дөрвөн талт Харилцан ойлголцлын санамж бичгийн хүрээнд хэрэгжиж байгаа бөгөөд уг санамж бичигт ШУТИС, “Нэг бүс – Нэг зам” Олон Улсын Хөгжлийн Академи (BRI), БНХАУ-ын Ляонин Төмөр Замын Мэргэжлийн Техникийн Коллеж (LNRVTC), Хятадын Төмөр Замын Нэгдүгээр Группийн “Мидвест Ази” компани оролцсон.

Нээлтийн үйл ажиллагаанд “Нэг бүс – Нэг зам” Олон Улсын Хөгжлийн Академийн захирал ноён Лю Яцун, Ляонин Төмөр Замын мэргэжлийн техникийн коллежийн проректор профессор Жао Мин, Хятадын Төмөр замын нэгдүгээр группийн Монгол дахь салбарын захирал Жан Жиндөү, ШУТИС-ийн ректор доктор, профессор Т.Намнан, Механик инженер, тээврийн сургуулийн захирал доктор, дэд профессор Н.Пүрэвдорж, хамтран хэрэгжүүлэгч багш, судлаачид, оюутнуудын төлөөлөл оролцлоо.

ШУТИС-ийн ректор Т.Намнан хэлсэн үгэндээ: “МОЗИ лаборатори нь орчин үеийн техник, технологид суурилсан сургалтын орчныг бүрдүүлээд зогсохгүй, Монгол–Хятадын боловсрол, шинжлэх ухааны хамтын ажиллагааны бат бэх гүүр болно гэдэгт итгэлтэй байна” хэмээн онцоллоо.

Жао Мин, Ляонин Төмөр Замын мэргэжлийн дээд сургуулийн проректор:

“МОЗИ лаборатори нь бидний хамтын хүчин чармайлтын үр дүн төдийгүй Хятад–Монголын боловсролын хамтын ажиллагаа гүнзгийрч буй бодит илрэл юм.” “Бид энэ лабораторийг олон улсын түвшний техник, ур чадвартай боловсон хүчин бэлтгэх талбар, сургалт-судалгаа-хамтын ажиллагааны нэгдсэн гүүр болгон хөгжүүлнэ.”

Тэрээр мөн МОЗИ лабораторийг дараах 5 чиглэлд хөгжүүлэх зорилтыг дурдав. Үүнд:

1. Олон улсын ур чадвартай мэргэжилтэн бэлтгэх талбар
2. Сургууль, сургууль, аж ахуйн нэгжийн хамтын ажиллагааны гүүр
3. Хамтарсан хөтөлбөр, хичээлийн нэгдсэн платформ
4. Суралцах кредит хүлээн зөвшөөрсөн боловсролын хамтын хөтөлбөрийн эхлэл
5. Соёлын харилцан ойлголцлыг гүнзгийрүүлэх шинэ талбар

МИТС-ийн захирал Н.Пүрэвдорж: “Шинээр нээгдэж буй энэхүү лаборатори нь Монгол Улсад төмөр зам, логистикийн чиглэлээр мэргэжилтэн бэлтгэх сургалтын чанарыг шинэ шатанд гаргах, олон улсын хөтөлбөрүүдтэй уялдуулан хөгжүүлэх суурь алхам болж байна. Энэ хамтын ажиллагаа улам өргөжин, Монгол–Хятадын найрамдалт харилцааны бодит жишээ болон хөгжихөд итгэл төгс байна” хэмээв.

Нээлтийн үеэр оюутнууд лабораторийн ач холбогдол, сургалтад үзүүлэх нөлөөллийн талаар сэтгэгдлээ хуваалцсан нь арга хэмжээнд урам өгсөн чухал хэсэг боллоо.

МОЗИ лабораторийг байгуулахад 1.2 тэрбум төгрөгийн өртөгт бүхий 24 нэр төрлийн, 100 гаруй тоног төхөөрөмжийг  нийлүүлээд  байна.

• Цахилгаан болон дизель зүтгүүрийн симуляторууд (HXD3C, HXN3)
• Зүтгүүрийн жолоодлогын симуляцийн программ хангамж
• Өндөр хүчин чадалтай компьютерүүд
• 75 инчийн ухаалаг самбар, мультимедиа дэлгэцүүд
• Логистикийн сургалтын зориулалттай иж бүрэн тоног төхөөрөмжүүд багтаж байна.

Лабораторийн үйл ажиллагаа нь оюутнуудад олон улсын түвшний чадвар эзэмшүүлэх практик сургалтын орчныг бий болгож, ШУТИС-ийн сургалтын чадавхыг нэмэгдүүлэх, инженерийн боловсролыг шинэ түвшинд гаргах, хоёр орны хамтын ажиллагааны загвар болж хөгжих боломжтой юм.

МИТС-ийн захиргаа

2025.04.02